被老闆迫做私人o野點反抗?
2008年5月19日

年輕人打工要捱要博態度絕對正確,但有時候遇到一些無良老闆,奄尖腥悶之餘,還提出一些無理要求,都幾惡頂。好像今期讀者Vicky來信,本身為Programmer的她,由於新入行,老闆竟然每天要她為同事買下午茶,還要她幫手接女兒放學、買電影戲票等私人事務,到底Vicky應該怎樣應付?

辦公室ER:
你好!今次來信,是我再忍受不了我那無良老闆。我大學是讀電腦系的,上年畢業後當然找相關工作,最後被一間小型電腦軟件公司聘請做Programmer,上班第一日老闆笑笑口對我說:「你新o黎新豬肉,應該請o下同事食tea。」那時我不以為意,當然叫好,誰知之後每日老闆都叫我幫全體員工買下午茶,有時還借頭借路唔畀番錢我。我知道自己剛出來做事,要忍氣吞聲,但之後他愈來愈過分,竟然要我在工作時間幫他上網買戲飛,甚至接他的女兒放學!我是Programmer,並非私人秘書,但我又怕拒絕老闆他會即時解僱我。到底我可以點做?老闆叫我做私人o野,又是否已犯法?

Vicky 上

據街坊工友服務處勞工幹事梁小姐說,就算上司叫Vicky做崗位以外的工作,甚至要她以私人時間完成,也沒有觸犯任何法例。「呢個都算係灰色地帶,就算Vicky份工作合約上寫明佢係一位Programmer,並列明工作範圍,但冇一條勞工法例講到,如果老闆叫員工做崗位範圍以外o既o野就係犯法,就算佢用自己私人時間去做都一樣。」據梁小姐說,只有以下兩個情況,老闆才有機會觸犯法例:「第一就係如果員工拒絕做佢工作範圍以外o既o野時,老闆威嚇佢:『你唔做我炒你喎!』咁樣恐嚇員工就可能犯法。第二就係如果老闆真係因員工拒絕做呢o的o野而炒佢,又冇賠錢的話,o個位員工就可以搵勞工處協助。但我諗冇一個老闆會用呢個理由炒員工咁蠢,所以呢個situation,員工係蝕底o的。」

以講笑形式試探

而中原人力資源顧問周綺萍說,像Vicky這個情況,只能施展「軟功」,與老細談判。「做老細o既,心態都會覺得年輕人態度應該肯學肯做。不過如果Vicky真係覺得受唔住,但又唔想冇o左份工,咁當老闆叫佢做額外o野時候,佢可以以講笑語氣同老闆講:『老細!你請我返o黎係做Programmer,唔係做baby seater喎!』等說話,睇o下佢反應,如果佢都唯唯諾諾,咁就真係可以認真約佢傾o下。但如果老細黑哂面,咁你就要醒目,考慮自己係咪真係咁需要份工?如果真係要進一步同老細談判,就要睇o下公司有幾需要你,即係你手中『籌碼』有幾多。最後方法當然係騎牛搵馬,邊做邊搵過第二份工。」周小姐補充,如果不想做本身崗位範圍以外的工作,就要盡快同老闆講。「好似Vicky呢個case,佢已經幫老闆做o左幾個月私人o野,就算第時真係?到上庭,老闆一句:『佢做o左幾個月都無拒絕,咁即係話佢都當o左呢o的係佢工作一部份啦!』到時員工就會好蝕底。」

反易通 二零零八年四月十五日